Plantun de Prouvènço

Pèr coumpara dos planto d'encò nostre

Gymnadenia nigra subsp. corneliana & Ononis spinosa subsp. antiquorum

Man-dóu-bon-Diéu

Gymnadenia nigra subsp. corneliana

Orchidaceae

Àutri noum : Man-dal-Diau-e-dal-boun-Diéu, Maneto.

Noms en français : Nigritelle de Cornelia, Nigritelle rose.

Descripcioun :
Poulit pichot gau, aquesto man-dóu-bon-Diéu (vo man-dal-Diau-e-dal-boun-Diéu : J.-L. Domenge, op.cit. p.60), Gymnadenia nigra, que s'atrovo dins lis àuti pelouso dis Aup. Li flour soun mens o mai roso e mai roso en aut de l'espigo qu'en bas. I'a pas de proublèmo particulié de determinacioun. La planto èi proutejido sus listo roujo, categourìo LC, es à dire soucit minour.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 7 à 20 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Gymnadenia
Famiho : Orchidaceae

Coulour de la flour : Roso
Petalo : irreguliero
Ø (o loungour) enflourejado : 1 à 3 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Remarco : Planto endemico
Jun à avoust

Liò : Pelouso - Pasquié
Estànci : Subaupen à Aupen
Couroulougi : Ouroufito-Sud-Ouèsr-Aupenco
Ref. sc. : Gymnadenia nigra subsp. corneliana (Beauverd) J.M.Tison, 2010 (= Gymnadenia corneliana (Beauverd) Teppner & E.Klein )

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.